Warriors gilumsan sa Lakers

CEBU, Philippines - Mikamada og 20 puntos matag usa sila si Lou Williams ug Julius Randle  alang sa Los Angeles Lakers nga mipahimus sa kabugnaw ni Stephen Curry aron paglubong sa Golden State Warriors, 117-97 ug ingon man paghatag ni coach Luke Walton og impresibong daog sa una niining duwa batok sa kanhi niya team.

Milangkat sab og 14 ka rebounds si Randle alang sa Lakers nga nagmaya taliwala sa pagkagar sa opensa ni Curry, ang two-time NBA Most Valuable Player nga wala makapasud bisan og usa sa 10 niini  ka 3-point shots. Mao kini ang labing unang higayon sud sa 157 ka duwa nga nabokya si Curry gikan sa 3-point area.

Si D’Angelo Russell midugang og 17 puntos ug si Larry Nance miamot og 12 puntos ug siyam ka rebounds sa Lakers nga maoy mikontrolar sa duwa gikan sa sinugdanan. Gawas nga milabay og 26 ka assists, ila sab nga gilupig ang Warriors sa rebounding, 51-40.

Nangu sa pilderong Warriors mao si Kevin Durant uban sa iyang 27 puntos ug gisundan kini ni Draymond Green  sa iyang 16 puntos ug siyam ka rebounds.

Si Curry mitapos lamang og 13 puntos uban ang 11 ka assists ug walo ka rebounds, samtang si Klay Thompson 10 puntos ra’y nahimo human upat lamang sa 18 niini ka itsa ang iyang napasud.

Sa laing mga duwa, si Kawhi Leonard miburak og 29 puntos ug 11 ka rebounds sa dihang nakabawos ang San Antonio Spurs batok sa Utah Jazz, 100-86.

Si Damian Lillard mipatuasik og 42 puntos sa dihang gibihag sa Portland Trail Blazers ang Dallas Mavericks, 105-95, si TJ Warren mihansak sa bola aron pag-aswat sa Phoenix Suns ngadto sa kulbahinam nga    daog batok sa New Orleans Pelicans, 111-110, samtang si Chris Paul mipabuhagay og 27 puntos ug 11 ka assists sa dihang giparot sa LA Clippers ang Memphis Grizzlies, 99-88.