Ang levirate marriage

Nobiyembre 6, 2016: Ikakatloa’g-tulo nga Domingo sulod sa tuig

Mga pagbasa: 2 Mac. 7;1-2,9-14/Sal.17/2 Tes. 2;16-3;5/Lk. 20:27-38

Kini ang balansayon sa mga Judio nga kinahanglang pangasaw-on mo ang biyuda sa imong igsuon aron imo kining atimanon. Kini ang hinungdan kun nganong dunay pito ka mga managsuon nga nakapangasawa sa maong biyuda ug silang tanan nangamatay nga way anak. Gigamit kini sa mga Saduseo sa pagpangutana kang Jesus nga inigkabanhaw sa mga matarong kang kinsa man siyang asawa nga silang tanan nakapangasawa man kaniya? Apan gitataw sa atong Ginoo nga sa kabanhawan ang pagminyoay dili na isyu sanglit ang mga tawo ang mamahimong sama sa mga anghel. Kay ang Dios, dios sa mga buhi ug dili sa mga patay. Kini ang atong gikuptan nga pagtuo ug paglaum nga human sa kamatayon anaa gyud ang kinabuhing dayon. Nga dili tuldok ang kamatayon hinunoa ang kamatayon mao man ang atong pagkahimugso padulong sa kinabuhing dayon.