May alas ba si Duterte?
Dihang gipangutana sa nitumaw nga kalibotanong kalibog sa nag-usab-usab niyang pamahayag human nideklarar nga independente na ang iyang foreign policy, si Presidente Rodrigo Duterte wa magtagad pagpapas sa kalibog apan igo lang nipasalig nga wa siya magpataka kay nahibawo siya sa iyang gipanulti.
Si Duterte nga gidayeg sa iyang mga dumadapig tungod sa kamaayo sa mga taktika, kansang malungtarong mga plano kasagarang hanigan og pasiunang mga lakang nga lisod masabtan apan kasagarang mosangpot sa malampusong pagpatuman, nipasalig nga may duha ka sakop sa iyang gabinete nga hingpit nga nakasabot sa iyang baruganan: Silang Finance Secretary Carlos Dominguez III ug Foreign Affairs Secretary Perfecto Yasay Jr.
* * *
Sa wa pa ning sulti ni Duterte, nga iyang giluwatan pagtugpa niya sa Davao gikan sa tulo ka adlaw nga state visit sa Japan, gipakaingon nato nga silang Dominguez ug Yasay igo lang nagkapuliki og sapupo sa hugaw ug desperado lang nga nibakwi sa lapad kaayo nga mga diskurso sa presidente. Karon gikumbinser tang Duterte nga ang duha maoy nakatugkad sa iyang mensahe.
Unsa may atong malilian sa mga pamahayag nilang Dominguez ug Yasay? Pulos sila nipasalig nga magpabilin ang suod nga relasyon sa Pilipinas ug sa Estados Unidos. Gani, si Dominguez nilusad og agresibong kampanya pagdani sa mga negosyanteng Amerikanhon pagbubo og dugang puhonan sa labing masaaron nato nga mga industriya.
* * *
Kun mao, unsa may gustong makuha ni Duterte sa hapit inadlaw niya nga pagpamalikas sa Estados Unidos, labi na nilang Presidente Barack Obama ug Ambassador Philip Goldberg? Unsa may gusto niyang makuha sa pagsige og abiba sa China, Russia ug Japan?
Kun sakto ang sulti nilang Dominguez ug Yasay, naglaom ba diay si Duterte nga inay mangluod magkara-kara ang Estados Unidos sa paghapuhap niya? Ug pagbubo sa Pilipinas ug mas daghang hinabang ug mga benepisyo aron pagtapak sa katuigan sa pagkuwang, nga igo lang tang giulug-ulogan nga maoy labing suod nilang higala, ug ubang mas bangis pang mga atraso sa kasaysayan?
* * *
Gisubli ni Duterte ang makadaghan na niyang giasoy nga pagtulon-an sa kapin sa duha ka dekada niyang pagduma sa Davao: Ang mainampingon nga pagsukod sa matag lakang ug pagpaabot sa labing tukmang panahon sa pagpatuman sa kinatibuk-ang plano.
Nipasalig si Duterte nga mas mainampingon siya karon. Kay nahibawo nga ang bisan unsang gamay nga sipyat makaangin sa tibuok nasud ug sa tanang katawhan.
Nikomedya siya sa mga sakop sa media nga istorya ra ang tanan niyang giluwatan. Kabahin ba sa iyang taktika ang pagkaukay karon sa kanasuran ug mga institusyon? Ug nga nagpaabot na lang sa ilang mga lakang pagsumbalik sa tanan niyang balikas ug panginsulto una pa mopagawas si Duterte sa kinakusgan niyang alas?
* * *
- Latest
