Barangay Kagawad nasikop tungod sa drugas

CEBU, Philippines - Gibalhog sa selda sa kapulisan sa lungsod sa Balamban ang usa ka barangay kagawad human nadakpan sa gihimo nga anti-drug operation diha sa Sitio Pitogo, Brgy. Singsing. Ang konsehal giila nga si Francis Eric Dacua, 39, kagawad sa Brgy. Hingatmonan, Balamban. Siya maoy tsirman sa barangay peace and order council sa ilang dapit.

Ang hepe sa Balamban Police nga si Sr. Insp. Ramil Morpos nga nahinabi sa Banat News miingon nga dugay na nga migawas ang pangalan sa konsehal nga nalambigit sa drugas. Ang kapulisan nagdala og  search warrant nga gi-isyu ni RTC Judge Ruben Altubar sa Branch 29 sa dakbayan sa Toledo batok ni Dacua.

Matud pa ni Morpos nga misuway og ikyas si Dacua apan ilang nahawiran, nakuha sa balay niini ang daghang shabu nga mikantidad og P118 mil ug usa ka .357 revolver nga walay lisensya.

Sigun pa ni Morpos nga mihimakak ang konsehal nga namaligya kini og shabu kay pangkunsomo ra niya ang nakuha nga drugas sa mga polis.

Apan sa nakuha nga impormasyon sa kapulisan nga sagad nga kostumer sa konsehal mga trabahante sa mga “haulers”sa maong dapit.

Diha sa balay sa kagawad, adunay nakita ang kapolisan nga daghang ginalon nga gasolina nga gidudahan ni Morpos nga maoy gibayad sa mga pahinante sa mga haulers bugti sa shabu.

Si kapitan Raymond Panulde sa maong barangay dihang nahinabi sa Banat News nitug-an nga dugay na siyang nakadungog nga tiggamitan ug tigpayuhot og ginadiling drugas ang konsehal apan wala pa lang siya nakaakto niini.

Hinuon iyaha na kining gitambagan sa paghunong apan giingong nirason ra nga dugay na kini mihunong sa maong bisyo. (BANAT NEWS)