Helterbrand ‘di pa magreretiro

MANILA, Philippines - Hindi na itinuloy ni 2008 PBA Most Valuable Player Jay­jay Helterbrand ang kan­yang naunang planong pag­reretiro matapos ang PBA season.

Matapos makipag-usap kay coach Tim Cone sa exit meeting kasama ang iba pang players ng Barangay Gi­nebra ay nagdesisyon ang 40-anyos na si Helter­brand na pumirma ng one-year contract para sa susunod na PBA season.

Muling ipinakita ni Helterbrand ang kanyang pamatay na porma nang makapag-ambag sa paghahari ng Gin Kings sa katatapos na 2016 PBA Governor’s Cup laban sa Meralco Bolts.

Matapos ang 91-88 pagtakas ng Ginebra sa likod ng buzzer-beating three-point shot ni import Justin Brownlee sa Game Six ng season-ending conference ay nakiusap ang 36-anyos na si Mark Caguioa na ipagpaliban ni Helterbrand ang kanyang pagreretiro.

“As you could tell, we’re su­per close off and on the court,” sabi ni Caguioa kay Hel­terbrand, nakatulong ni­yang gumiya sa Gin Kings sa huling korona noong 2008 PBA Fiesta Cup. “He better not retire man. That’s what I’m saying.”

Samantala, magpupulong ang PBA Board of Go­vernors sa Huwebes pa­ra plantsahin ang usapin sa draft order para sa mga pla­yers ng Gilas Pilipinas na lalahok sa 2015 Rookie Draft sa Oktubre 30 sa Ro­binson’s Place sa Ermita, Ma­nila.

Reresolbahin ng PBA Board kung anong draft or­der ang gagamitin para sa 12 players ng Gilas na sa­salang sa isang special draft kasunod ang regular draft ng liga.

Kung susundin ang re­gular draft order ay inaasa­hang kukunin ng Blackwater bilang No. 1 overall pick si 6-foot-4 Gilas power forward Mac Belo.

Ang iba pang miyembro ng Gilas Pilipinas ay sina Carl Bryan Cruz, Ed Daquioag, Russel Escoto, Kevin Ferrer, Jio Jalalon, Von Pes­sumal, Roger Pogoy, Mike Tolomia, Arnold Van Opstal, Matthew Wright at Alfonso Gotladera.