VakifBank pasok sa semis ng WCWC
MANILA, Philippines - Inangkin ng VakifBank Istanbul ang ikatlong semifinals ticket matapos gibain ang Bangkok Glass ng Thailand, 25-19, 25-23, 25-18, sa 2016 FIVB Women’s Club World Championship kahapon sa Mall of Asia Arena sa Pasay City.
Ito ang ikalawang panalo ng mga Turkish sa tatlong laro para makasama sa semis ang Volero Zurich at Eczacibasi VitrA.
Binanderahan ni Lonneke Sloetjes ang VakifBank Istanbul sa kanyang 17 points para saluhin ang naiwang trabaho ni Chinese star spiker Zhu Ting sa torneong inorganisa ng Philippine Superliga at Eventcourt katuwang ang TV5, Petron, Nature Spring, Asics, BMW at F2 Logistics bilang sponsors, ang Diamond Hotel bilang official residence at Turkish Airlines bilang official airlines.
Pinaglaro lamang si Zhu, humataw ng 31 points laban sa Volero Zurich noong Huwebes, sa first set at nagtala ng 8 points.
Nagdagdag si Turkish veteran Kirdar Gozde ng 8 kills, 2 aces at 1 block at tumapos na may 11 points para sa VakifBank, nanalo sa Pomi Casalmaggiore sa nakaraang European championship.
Kinuha ng VakifBank ang 17-16 abante sa third set kasunod ang attack error ni Pleumjit Thinkaow sa panig ng Thai squad na tuluyan nang sumelyo sa panalon ng Turkish team.
Lalabanan ng VakifBank ang Eczacibasi VitrA sa knockout semifinals ngayon.
Kasalukuyan pang kalaro ng Eczacibasi ang sibak nang PSL-F2 Logistics Manila, nagdadala ng 0-2 record, habang isinusulat ito.
- Latest