Na hit-and-run patay
CEBU, Philippines - Patay ang drayber sa motorsiklo human kini na hit-and-run sa Barangay Tinaan, Dakbayan sa Naga pasado alas 7 sa nakalabay nga buntag.
Ang biktima giila nga si Nemil Giancarlo, 26, ulitawo taga Sambag 2, Dakbayan sa Sugbo.
Sa imbestigasyon sa Naga City Traffic Police nasayran nga usa ka puti nga Izusu Elf ang naka-hit-and-run sa biktima.
Apan giklaro sa kapolisan nga wala gyud nakakita ang testigos sa aksidente kinsa atol sa iyang paglabay sa maong dapit iya na lang nakit-an ang biktima nga nagbuy-od sa karsada ug ang puti nga Isuzu Elf ang iyang nakita nga dili layo sa motorsiklo.
Suway pa unta nga gidala sa Minglanilla District Hospital ang biktima apan nakabsan gyud sa kinabuhi.
Si PO3 Michael Villarmia, desk officer sa Naga City Police Station, niingon nga hangtud karon wala pa gyud silay suspek nga nakuha sa maong krimen.
Usa sa gisubay sa kapolisan ang kuha sa close circuit television (CCTV) camera sa maong dapit aron makatabang sa ilang imbestigasyon. (BANAT NEWS)
- Latest
