Libreng sungkod gihatag sa mga senior citizen

CEBU, Philippines - Dili matukib ang kalipay nga gibati sa mga senior citizen nga nakadawat og libreng sungkod subay sa kasaulogan sa Senior Citizens Month.

Libre silang gihatagan og sungkod ni Cebu City Councilor Jerry Guardo pinaagi usab sa iyang pakig-alayon sa pribadong indibidwal nga nitabang.

Muabot sa 50 ka senior citizens gikan sa North ug South District ang nakadawat og sungkod nga gitunol kagahapon sa Cebu City Hall. Ang maong programa ni Konsehal Guardo, nasugdan dihang kapitan pa kini sa Barangay Sambag 1.

 Matud ni Guardo, iyang nakita ang panginahanglan sa mga senior citizen og sungkod ilabi na kun magkuha sila sa ilang financial assistance.  Adunay uban nga magsangkiig og lakaw, adunay gagamit og payong isip sungkod ug kahoy, nga gihulagway sa Konsehal nga delikado.

 Giabagan si Guardo sa maong programa sa iyang higala nga Japanese National nga si Harou Inawaga kinsa maoy nipalit sa mga sungkod didto sa Japan, mao nga siguradong lig-on ug dili daling maguba.

 Nasayran nga mao kini ang unang hugna sa mga sungkod nga gipang-apod-apod ug gipaabot nga aduna pay lain kay magpadayon man ang maong programa.

 Alang niadtong gustong makaangkon og libreng sungkod, ang kinahanglan lang mao nga registered voter sa Siyudad sa Sugbo ug magparehistro sa buhatan ni Konsehal Guardo. (BANAT NEWS)