Seguridad sa piyesta sa Talisay andam na

CEBU, Philippines - Gipahibawo sa kapolisan sa Dakbayan sa Talisay nga andam na ang seguridad sa kapistahan ni Sta. Teresa de Avila karong Sabado, Oktubre 15.

Matud ni Supt. Aileen Recla, hepe sa Talisay City Police Station, nga nindot ang ilang deployment tungod kay daghang grupo ang nisuporta kanila lakip na ang mga barangay tanod ug auxiliary groups.

Nipadala sab og 20 ka polis ang Cebu Provincial Police Office (CPPO) aron makatabang.

Nagkanayon si Recla nga ilang gipokusan sa paghatag og saktong gidaghanon sa mga polis ang panahon sa kagabhion diin daghan ang kalingawan ug mao sab ang oras sa pag-novena.

Kagahapon nihatag sab sila og seguridad sa mga tawo nga nanguyog ug nisaksi sa fluvial procession.

Hinuon si Recla nitug-an nga wala silay nadawat nga hulga sa dautang elemento nga mopahimulos sa kalihukan. Iya gihangyo ang katawhan nga magpabilin og taas nga pasensiya labi na kung moagi sa Dakbayan sa Talisay tungod kay daghan gyud nga sakyanan ang matanggong sa trapiko. (BANAT NEWS)