Smith bag-ong naturalized player sa Gilas

CEBU, Philippines - Ang import sa Blackwater Elite nga si Greg Smith opisyal na nga gihimong bag-ong naturalized player sa Gilas Pilipinas human magkasinabot ang Samahang Basketbol ng Pilipinas ug sa Amerikanong basketbolista. Si Smith, 26-anyos   gitakdang mopirma og playing contract uban sa Gilas Pilipinas.  Ang ex-NBA cager moduwa  sa nasudnong koponan hangtod sa tuig 2023. Mopaubos pa hinuon sa proseso sa kongreso ug senado ang naturalized citizenship ni Smith.

Tungod kay dili pa siya pormal nga Filipino citizen, si Smith mahimo una nga practice player sa Gilas, samtang pabilin nga naturalized player sa koponan si Andray Blatche.

Daku hinuon og papel si Smith sa kampanya sa nasud karong tuiga tungod kay siya ang tahasan pagbaid sa abilidad sa mga sentro sama ni JuneMar Fajardo  samtang magpaabot siya nga mahimo nang usa ka Filipino citizen.

Ang forward sa Blackwater nga si Smith mo-average og dul-an sa 30 puntos matag duwa sa nagpadayong PBA Commissioner’s Cup.

Una nang giduso nga mangita na ang nasud og bag-ong naturalized player tungod  kay 30-anyos na si Blatche. Misamot ang kaagresibo sa mga SBP officials nga mangita og ikapuli ni Blatche kay pirme kining mapalta sa team practice. (BANAT NEWS)