Mananga bridge kuyaw mahagsa

Tulay sa Mananga posibleng mahagsa sa pag-usab tungod sa mga ilegal nga pagpangubkob og balas ug mga graba diha sa sapa.

Ang hepe sa Cebu 2nd Engineering District Daisy Toledo nagkanayon kagahapon nga usa ka multi-agency group nga  pangulohan na sa iyang buhatan ang migama og sugyot sa pag-regulate ang mga gipahigayong pagpangubkob diha sa Mananga aron malikayan ang trahedya.

Kahinumduman nga niadtong  1980 nahagsa ang unang tulay sa Mananga diin adunay daghang kinabuhi ang nangakalas sa maong insidente.

Matud ni Toledo nga angayang ma-legalize ang quarrying diha sa lugar para ma-regulate kini aron walay mawagtangan sa panginabuhian ug mapahimangnoan ang mga mag-quarry kun asa lang sila dapita puwedeng mangubkub og mga mga balas ug graba.

Ang nahisgutang multi-agency group ni Toledo pa, pareha kini siya og "quasi"  Mananga Task Force nga tubag sa awhag sa Department of Environment Natural Resources (DENR) aron mopahigayon og aksiyon kabahin sa mga taho sa ilegal nga pagpangubkob diha sa Mananga.

Si Roger de Dios, sa Mines and Geo Sciences Bureau nagkanayon nga iyang makita samtang magbiyahe siya gikan sa iyang pinuy-anan sa Minglanilla paingon   sa dakbayan nga adunay mangubkub diha sa Mananga sulod sa usa ka kilometro sa ginadili nga lugar nga kubkuban.

Matud ni de Dios nga adunay mandato nga ginadili ang pagkubkob sulod sa usa ka kilometrong distansiya gikan sa estraktura nga gipabarog sa gobyerno.

 Si Toledo nagkanayon nga duna silay nakitang mga depression o pagkahulpa diha sa lugar nga nahimutangan sa tulay hinungdan nga miawhag siya sa Department of Public Works and Highways (DPWH) sa rehiyon nga mopahigayon og pagtuon niini aron masulbad ang maong problema ug malikayan ang disgrasya.

Ang hepe sa 2nd Engineering District midungag nga dili kritikal ang kondisyon sa sitwasyon sa tulay sa Mananga apan kun dili mahunong ang ilegal nga kalihukan diha sa lugar posibleng mahagsa ang tulay.