TRO sa 700,000 license plates binawi ng SC

MANILA, Philippines — Maaari nang ipamahagi ang 700,000 plaka ng sasakyan na kinumpiska ng Bureau of Customs (BoC) makaraang bawiin ng Korte Suprema ang inisyu nitong temporary restraining order (TRO) noong Hunyo 2016.

Ang mga plaka ng sasakyan ay kinumpiska ng BoC dahil sa kabiguan ng manufacturer nito, ang joint venture ng Power Plates Development Concepts Incorporated at J. Knieriem BV Goes, na magbayad ng buwis at Customs duties.

Ang mga plaka ay kinabibilangan ng 300,000 license plate para sa mga motor vehicle at 400,000 license plate para sa mga motorsiklo.

Sa en banc session kahapon, idineklara rin ng Korte Suprema na constitutional ang paggamit ng pondo ng gobyerno sa ilalim ng 2014 General Appropriations Act  (GAA) para sa pagpapatupad ng Motor Vehicle License Plate Standardization Program ng Land Transportation Office at Department of Transportation.

Ang nasabing programa ay napanalunan ng joint venture ng Power Plates at J. Knierem BV Goes, pero ang kasunduan ay pinatawan ng notice of disallowance ng Commission on Audit at iniutos ang pagsasauli ng P477.9 million na advance payment ng LTO.

Kinuwestiyon ni dating Abakada partylist representative Jonathan dela Cruz ang constitutionality ng kasunduan dahil sa kabila ng kawalan ng appropriation para sa nasabing programa, itinuloy ng gobyerno ang bidding at pagagawad ng kontrata para sa programa.

Gayunman, ibinasura ng SC ang petisyon ni dela Cruz dahil kumbinsido ang hukuman na ang programa ay bahagi ng 2014 GAA at ang paggamit ng pondo na inilaan para rito ay tumatalima sa Konstitusyon.