Reso bubuuin ng Party-list para manatili sa puwesto

MANILA, Philippines — Magbubuo ng resolusyon ang buong Party-list coalition sa Kamara para matiyak na hindi sila mabubura sa ilalim ng Federal Constitution.

Sinabi ni PBA Party-list Rep. Jericho Nograles, ang kanilang resolusyon ay ia-address ng kanilang koalisyon sa Constituent Assembly (Con-ass).

Ito ay para hilingin sa Con-ass na igalang at panatilihin ang probisyon tungkol sa Party-list system na nasa 1987 Constitution sa ilalim ng Federal Constitution.

Ayon pa kay Nograles, hindi nila ito ginagawa dahil sa takot sa salita noon ni Pangulong Duterte na ipalulusaw niya ang mga Party-list.

Ang Pangulo naman umano ay walang kakayahan na mag-amyenda sa Saligang Batas at tanging ang mga kongresista at senador lamang sa pamamagitan ng Con-ass.

Iginiit pa ni Nograles na ang Party-list coalition ay may kanya-kanyang adbokasiya at mayroon din silang silbi kaya hindi sila maaaring mawala.