Truck maintenance worker dedo sa pamamaril
MANILA, Philippines — Dead-on-arrival sa Gat Andres Bonifacio Memorial Medical Center (GABMMC) ang 40-anyos na truck maintenance worker nang pagbabarilin ng di nakilalang salarin sa Aduana compound, Tondo, Maynila, kahapon ng madaling araw.
Kinilala ang biktimang Noel Tan, residente ng Damayan St., Dalandanan, Valenzuela City.
Blangko pa sa motibo at pagkilanlan ng gunman ang mga awtoridad dahil walang nakalap na nakasaksi sa aktuwal na pamamaril at wala ring closed circuit television sa pinangyarihan.
Sa ulat ni SPO4 Glenzor Vallejo ng Manila Police District-Homicide Section, naganap ang insidente dakong alas-2:00 ng madaling-araw sa loob ng Aduana, Slip 0, Pier 2, Tondo.
Sa nakuhang salaysay ng imbestigador sa mga kasamahan ng biktima, natutulog umano sa loob ng truck ang isang driver na Crisson Vendivil, nang makarinig ng putok na inakalang firecracker lamang subalit humahangos na ibinalita umano sa kaniya ng kasamahang si Jeffrey na nagsabing binaril si Tan.
Abala umano si Jeffrey sa pag-aayos ng twist lock ng truck nang makarinig ng putok at agad niyang inalam kung saan nagmula at nadiskubre na duguang nakabulagta na ang biktima kaya ipinabatid kay Vendivil.
Nang usisain ay duguan ang tagiliran at kaliwang binti kaya dinala agad sa pagamutan.
- Latest
