‘Drug lord’ nilikida
MANILA, Philippines — Isa umanong drug lord ang pinatay ng hindi pa nakikilalang mga armadong salarin sa isang pribadong lote sa Biñan City, Laguna nitong Martes.
Sa ulat ni Laguna Provincial Police Office (PPO) Director P/Sr. Supt. Cecilio Ramos Ison Jr., dakong alas- 6:00 ng umaga ng madiskubre ang nakabu-lagtang bangkay ng biktima sa isang bakanteng lote sa Brgy. Zapote ng nasabing lugar.
Ang biktima na kasalukuyan pang inaalam ang pagkakakilanlan ay may nakalagay pang cardboard sa katawan na may mga nakasulat na katagang “huwag tularan, drug lord ako”.
Ayon sa imbestigasyon, isang residente sa lugar ang nakakita sa nakabulagtang bangkay na may mga tama ng bala sa katawan kaya agad inireport sa mga pulisya ang insidente.
Samantalang ilang hindi nakilalang kalalakihan ang nakita umanong tumatalilis sa lugar ilang minuto matapos ang krimen.
Kasalukuyan namang inaalam ng pulisya kung may kinalaman sa droga ang pamamaslang sa nasabing mister.
Patuloy din ang imbestigasyon sa kaso upang matukoy ang motibo ng krimen.
- Latest