Indiscriminate firing sa Central Luzon: Pulis na masasangkot, aarestuhin

MANILA, Philippines — Mariing nagpaalala at nagbabala kahapon si Police Regional Office (PRO) 3 Director P/Chief Supt. Amador Corpus sa mga pulis sa Central Luzon hinggil sa indiscriminate firing ngayong Kapaskuhan at sa nalalapit na pagsalubong sa Bagong Taon.

Kasabay nito, ipinag-utos ni Corpus ang m­alawakang crackdown laban sa indiscriminate firing ng mga armas.

Ginawa ni Corpus ang babala para sa maayos at matiwasay na pagdiriwang ng Kapaskuhan at Bagong Taon.

“We will be very strict in cracking down on those indiscriminately firing their weapons. These include our own men, our brothers in the military, security guards, and civilian firearm holders. Those caught firing their firearms indiscriminately to welcome Christmas and the New Year will be arrested and charged “, ani Corpus.

Sinabi ni Corpus, bukod dito ay sisibakin sa puwesto ang mga pasaway na parak.

Samantalang bilang pagtalima sa kautusan ni PNP Chief P/Director General Ronald dela Rosa ay hindi na nila gagawin ang pagseselyo ng dulo ng mga armas.

 Idineklara rin ng opisyal na “ No firecracker zones “ ang himpilan ng PRO 3, iba’t-ibang mga pulisya sa mga bayan, lalawigan gayundin sa mga lungsod sa Central Luzon.

Pinayuhan naman ni Corpus ang mamama­yan na maging vigilante upang hindi mabiktima ng mga kawatan ngayong Kapaskuhan.

“We will intensify our efforts to prevent any unscrupulous activities to take place so that all may enjoy the festivities”, ang sabi pa ng opisyal.