Federalism isusulong pa rin ng Malacañang
Ayon kay Communications Secretary Martin Andanar, ipagpapatuloy ng gobyerno ang pagpapaintindi sa mga mamamayan kung bakit kinakailangan ng magbago ang porma ng gobyerno. Presidential Photographers Division/Albert Alcain, File
MANILA, Philippines — Isusulong pa rin ng Malacañang ang federalism kahit pa sinasabing hindi masyadong interesado dito ang mga mamamayan.
Ayon kay Communications Secretary Martin Andanar, ipagpapatuloy ng gobyerno ang pagpapaintindi sa mga mamamayan kung bakit kinakailangan ng magbago ang porma ng gobyerno.
Mismong si Pangulong Duterte ay aminadong hindi pa handa ang mayorya ng mga Filipino sa federalism.
Pero sinabi ni Andanar na sinabihan siya ng Pangulo na ituloy ang mga information drive para mas maintindihan ng mga mamamayan.
“Sabi niya, dapat ituloy ito, dapat ituloy ‘yung information drive para maintindihan ng ating mga kababayan,” ani Andanar.
Aminado rin umano ang Pangulo na kailangan na ang tulong ng media para maipaunawa sa mga mamamayan ang tungkol sa federalism.
Nauna ng napaulat na nakahanda ang Pangulo na makipagkasundo sa ABS-CBN na palagi niyang nababanatan kapalit ang pagtulong ng nasabing kompanya ng telebisyon sa pagpapaalam sa taumbayan tungkol sa pederalismo.
Naniniwala ang Pangulo na magkakaroon ng kapayapaan sa Mindanao kung magkakaroon ng pagbabago sa porma ng gobyerno.
- Latest
