4 na mayor sa Southern Luzon, tinanggalan ng kontrol sa pulisya
MANILA, Philippines — Apat na mayor ng Southern Luzon ang tinanggalan ng supervisory at control powers sa kani-kanilang mga kapulisan dulot ng diumano’y kinasasangkutang ilegal na aktibidad katulad ng sa droga at iba pang grave offenses.
Ayon kay officer-in-charge Catalino Cuy ng Department of Interior and Local Government, isa si Lucena City Mayor Roderick Alcala ng lalawigan ng Quezon ang inalisan ng police powers sa ilalim ng Napolcom Resolution 2017-611.
Kabilang pa sa listahan ng tinanggalan ng police powers ay ang mga alkalde ng Bay at Los Baños ng Laguna at Ibaan, Batangas.
Sa ipinalabas na Resolution 2017-611 noon Disyembre 11, pinangalanan sina Mayor Juan Toreja ng Ibaan, Bruno Ramos ng Bay, at Ceasar Perez ng Los Baños na kabilang sa mga naalisan ng kapangyarihan na pamunuan ang kani-kanilang kapulisan.
Sa ilalim ng batas, ang Napolcom ay may kapangyarihan kastiguhin ang sinumang lokal na opisyal na masasangkot sa ilegal na droga at iba pang pagkakasala, kasama na ang madalas at walang pahintulot na pagliban sa trabaho.
Isinasangkot si Maya Alcala sa operasyon ng illegal drugs ng kanyang tiyo na si Cerilo ‘Athel’ Alcala, na ayon sa PNP ay isang top drug lord sa Quezon.
Samantala, ayon kay Mario Guanzon, abogado at direktor ng DILG Public Affairs and Communications Service, may mga lokal na opisyal na sangkot sa kalakaran ng iligal na droga ang umaapela na maalis ang kanilang mga pangalan sa listahan ng Napolcom.
- Latest