Taas-singil sa tubig sa Enero 2018
MANILA, Philippines — Pagpasok ng Enero 1, 2018, mararanasan na ng mga residenteng sinusuplayan ng tubig ng Maynilad Water Services Inc. ang bahagyang taas sa singil sa tubig.
Ito ay makaraang aprubahan ng Metropolitan Waterworks and Sewerage System (MWSS) ang Foreign Currency Differential Adjustment (FCDA) ng Maynilad na may equivalent na 0.60 percent na batay sa bagong aprubang 2018 Average Basic Charge na P35.48/cubic meters. Ipatutupad ng Maynilad ang average basic rate adjustment na P0.97/cubic meter na katumbas sa 2.80 percent ng P34.51/cu.meter na average Basic Charge ng 2017 para sa Consumer Price Index (CPI) adjustment.
Bunga nito, kung ang isang residente ay kumukunsumo ng tubig ng 10 cubic meters na ang monthly bill nito sa tubig ay P118.95 ngayong 2017, sa 2018 ito ay magiging P 121.65 na o may taas na P 2.70 kada buwan.
Kung ang konsumo ng tubig ay aabot sa 20 cubic meter kada buwan na may monthly bill na P 445.56, sa 2018 ay aabutin na ito ng P455.74 o may taas P10.18 kada buwan at kung ang kunsumo ng tubig ay 30 cubic meters na may monthly bill na P909.54 kada buwan, sa Enero 2018 ay aabutin na ito ng P930.32 kada buwan o may P20.78 taas kada buwan.
- Latest
