Martial law sa buong bansa ‘di pa napapanahon – AFP
Sinabi ni Gen. Rey Leonardo Guerrero na hindi niya nais pag-usapan ang posibleng pagrerekomenda ng militar kung marapat bang ipatupad ang martial law sa buong bansa. File
MANILA, Philippines — Hindi pa napapanahon para isailalim sa martial law ang buong bansa kaugnay ng determinadong hakbangin na masupil ang New People’s Army (NPA) terrorists at iba pang mga grupong banta sa pambansang seguridad.
Ito ang inihayag kahapon ni Armed Forces of the Philippines (AFP) Chief of Staff Gen. Rey Leonardo Guerrero kasunod sa pangambang pagdedeklara ni Pangulong Rodrigo Duterte ng martial law sa buong bansa.
Sinabi ni Guerrero na hindi niya nais pag-usapan ang posibleng pagrerekomenda ng militar kung marapat bang ipatupad ang martial law sa buong bansa.
Ginawa ni Guerrero ang pahayag matapos na aprubahan noong Miyerkules ng joint session sa Kongreso ang 1-taong extension ng martial law sa buong rehiyon ng Mindanao.
Aminado si Guerrero na ang pagpapatupad ng martial law sa buong bansa ay nakadepende sa sitwasyong pulitikal at kung magiging bayolente ang mga grupong banta sa seguridad sa pangunguna ng NPA terrorists.
“Kung magiging violent sila, siguro the answer is obvious,” anang opisyal.
Kaugnay naman sa umiiral na martial law sa Mindanao, sinabi ni Guerrero na makakaasa ang taumbayan na sisikapin ng tropa ng militar na wala silang magiging paglabag sa karapatang pantao.
- Latest
