Babaeng recruiter ng ISIS kinasuhan

MANILA, Philippines — Kinasuhan na ng Department of Justice (DoJ) ang babaeng umano’y recruiter ng International terrorist group na ISIS na naaresto ng mga tauhan ng National Bureau of Investigation sa Taguig.

Sa 10-pahinang resolusyon ng DOJ na pirmado nina Senior Asst. State Prosecutor Peter Ong at aprubado ni Acting Prosecutor General George Catalan, sinampahan na ng 296 kaso ng inciting to rebellion o paglabag sa article 138 ng Revised Penal Code kaugnay ng section 6 ng RA 10175 o Cybercrime Prevention Act of 2012 laban kay Karen Aizha Hamidon sa Taguig RTC.

Si Hamidon ay naaresto sa Taguig noong Oktubre na nauna nang naging person-of-interest matapos makahikayat ng ilang mga Indian nationals na pumunta sa Pilipinas para sumali sa radical islamic groups sa Mindanao.

Ayon sa NBI, mayroon itong 296 na posts sa social media nang panghihikayat ng mga bagong miyembro ng ISIS at nagsusulong din ng rebelyon sa Marawi City. 

Si Hamidon ay sinasabing asawa ni Mohhamad Jaafar Maguid alyas Tokboy at Abu Sharifa na itinuturong lider ng Ansar Khalifa Philippines na responsable sa pambobomba sa Davao City Night Market noong December 2016.