Panglao mayor sinuspinde!

4 talunang kandidato binigyan ng posisyon

MANILA, Philippines — Sinuspinde ng Ombudsman ng tatlong buwan si Panglao, Bohol Mayor Leonila Montero matapos mapatunayang “guilty” sa “simple misconduct” na may kinalaman sa pagtatalaga ng apat na talunang kandidato sa kanyang tanggapan.

 Bukod dito, pinakakasuhan din ni Ombudsman Conchita Carpio Morales si Montero ng graft at 4 counts ng unlawful appointment matapos magtalaga ng apat na talunang kandidato sa nagdaang 2013 elections.

 Ang apat ay kinuha ni Montero bilang mga  consultants  at pinasasahod ng  P25,000.00 kada buwan noong 2013.

 Sa rekord, itinalaga ni Montero sina Noel Homarchuelos bilang municipal administrator/consultant for administrative services; Danilo Reyes bilang public information consultant; Apolinar Fudalan bilang public employment service office coordinator/IT consul-tant; at Fernando Penales bilang  infrastructure/engineering consultant. Kinuha ang kanilang serbisyo sa pamamagitan ng job order basis at silbihan si Mayor Montero na wala man lamang anumang contract of service o appointment paper na pinag-aralan at inaprubahan ng Sangguniang Bayan.  

 Sa imbestigasyon, walang daily time records ang apat na consultants na naitalaga ni Montero.  Ayon sa Commission on Audit, ang pagbabayad ng serbisyo sa apat ay naisagawa nang wala man lamang aprubadong accomplishment reports at individual contracts na paglabag sa Section 4(6) ng Government Auditing Code.

 Sa probisyon ng Local Government Code, pinagbabawalan sina Hormachuelos, Reyes, Fudalan at Penales  na makakuha ng anumang posisyon sa gobyerno isang taon makaraan ang 2013 elections.