Team ng PNP operatives nakaligtas sa ambush
MANILA, Philippines — Nakaligtas sa ambush ang team ng mga operatiba ng pulisya makaraang tambangan ng mga teroristang New People’s Army (NPA) sa kahabaan ng highway sa Barangay Trinidad sa Surigao City, Surigao del Norte kamakalawa ng umaga.
Sa police repot ni P/Supt. Diomedes Cuadra Jr., hepe ng Provincial Public Safety Company ng Surigao del Norte Police, kasalukuyang bumabagtas sa highway ang sasakyan ng mga pulis pabalik sa himpilan nang tambangan ng mga NPA terrorists sa pamumuno ng alyas Ka Jun.
Sa kabila naman ng sorpresang pag-atake ay gumanti ng putok ang mga pulis habang nakaresponde naman ang kanilang kasamahang pulis sa nasabing bakbakan.
Tumagal ng ilang minuto ang bakbakan bago nagsitakas ang NPA terrorists patungo sa direksyon ng kagubatan.
Samantala, gumamit naman ang PPSC operatives sa pagtukoy sa kinaroroonan ng NPA terrorists kung saan ay muling nagkaputukan ang mga pulis at ang grupo ng NPA.
Agad na nagsitakas ang mga torista sa encounter site bitbit ang mga sugatang kasama.
Samantala, wala namang nasugatan sa pa-nig ng mga pulis habang patuloy ang opensiba laban sa mga teroristang nagsitakas.
- Latest