Pacman, 186 estudyante, reservists magtatapos
MANILA, Philippines — Nakatakdang magtapos ngayong araw ang 187 estudyante at ilang reservists kabilang si boxing champion at Senador Manny “Pacman” Pacquiao matapos sumailalim sa schooling sa General Command and Staff College sa Camp Aguinaldo.
Sinabi ni Lt. Commander Emerson Namoca, spokesman ng Education and Training Command ang mga magsisipagtapos na kinabibilangan ng boxing icon ay pawang produkto ng CGSC Class 62.
Ang seremonya ay gaganapin sa AFP Commissioned Officers Club sa Camp Aguinaldo sa ganap na alas-9 ng umaga.
Ang mga ito ay pormal na magsisipagtapos matapos sumailalim sa ilang buwang schooling. Alinsunod sa patakaran, ang bawa’t estudyante at mga reservists sa CGSC ay dumaraan sa anim hanggang walong buwang schooling sa isa sa premyadong institusyon ng militar.
Sa kabuuang 187 magsisipagtapos ay 166 ang mga opisyal ng AFP na sumasalang sa schooling para sa kanilang promosyon at 21 naman ang mga reser-vist kabilang si Pacman.
“After finishing his schooling at CGSC. He is now eligible for promotion to full Colonel,” ayon sa opisyal na nilinaw na ang liderato ng Philippine Army kung saan reservist si Pacman ang magpro-promote dito pero kailangan pa itong dumaan sa proseso kung saan magsusumite muna ng mga rekisitos ang boxing icon.
Magugunita na si Pacman ay unang pumasok bilang reservist ng Philippine Army noong Abril 2006 sa ranggong Sergeant sa rekomendasyon ni dating Brig Gen. Alexander Yano.
Anim na buwan matapos ay tumanggap muli ng promosyon si Pacman noong Oktubre 2007 bilang Master Sergeant at Senior Master Sergeant noong Mayo 2009 na nangyari sa tuwing magwawagi ito sa kaniyang laban sa boxing arena.
Samantala, noong Setyembre 2011 ay na-promote naman bilang Lt. Colonel ang pambansang kamao.
- Latest