Sanofi ginisa sa Senado, inakusahan ng ‘mental dishonesty’
MANILA, Philippines — Inakusahan kahapon ni Health Secretary Francisco Duque III ng “mental dishonesty” ang Sanofi Pasteur, ang manufacturer ng Dengvaxia vaccine sa unang bugso ng imbestigasyon kahapon ng Senate Blue Ribbon Committee na pinamumunuan ni Senator Richard Gordon.
Ayon kay Duque, hindi isiniwalat ng Sanofi ang lahat ng impormasyon tungkol sa dengue vaccines na binili ng gobyerno noong nakaraang administrasyon sa halagang P3.5 bilyon.
“I’m accusing you of mental dishonesty. You could have been more forthright and I think they have not been forthright from the very beginning,” pahayag ni Duque.
Sinabi pa ni Duque na hindi naging tapat ang Sanofi Pasteur tungkol sa panganib na maaaring idulot ng bakuna. Hindi umano binanggit ng Sanofi ang grade 3 symptoms.
Matatandaan na nagpalabas ng warning nitong Nobyembre 29 ang Sanofi na base sa kanilang post-trial tests maaaring manganib ang mga pasyenteng nabigyan ng vaccines na hindi pa nagkakaroon ng dengue.
Inihayag din ni Duque sa pagdinig na agad nilang binuo ang executive committee at sinuspinde ang pagbabakuna matapos magpalabas ng warning ang Sanofi.
Nabatid na ang pagbibigay ng Dengvaxia ay nagsimula noong Abril 2016.
Sinabi rin ni Duque na maaari pa ring magkaroon ng dengue ang mga nabigyan na ng bakuna.
Iginiit naman ni Sanofi Asia Pacific Head Thomas Triomphe na humarap sa pagdinig na hindi lamang delikado kung hindi isang reyalidad at endemic ang dengue sa Pilipinas. Gayunman, ligtas at epektibo pa rin aniya ang Dengvaxia vaccines na patuloy umanong ginagamit ng 11 bansa.
Iginiit din ni Triomphe na wala silang nakikitang kapabayaan sa kanilang kumpanya at agad din nilang ipinaalam sa mga national regulatory agencies nang malaman ang posibleng “adverse events” ng vaccines.
- Latest