2 holdaper na gumagala natimbog
MANILA, Philippines — Nagbabala ang pulisya sa publiko na umuuwi ng sobrang gabi dahil sa mga Christmas party na mag-ingat sa mga kawatan na nagkalat ngayon makaraang isang holdaper ang nadakip matapos na mambiktima ng isang babae na galing sa kasayahan kamakalawa ng gabi sa Pasay City habang isa pa ang nadakip sa hiwalay na insidente sa Caloocan City.
Nahaharap ngayon sa kasong robbery-hold up ang suspek na si Benjamin Tongco, 40-anyos, miyembro ng Sputnik street gang at naninirahan sa Tramo, Pasay City.
Sa inisyal na ulat ng Pasay City Police, mag-isang sakay ng pampasaherong jeepney dakong alas-11 ng gabi ang biktimang nagpatago sa pangalang “Lyn” nang sumakay ang suspek sa may Aurora Boulevard sa naturang lungsod. Agad siyang tinutukan ng patalim ng suspek at hinablot ang kanyang bag.
Mabilis namang nakahingi ng tulong sa mga nagpapatrulyang bara-ngay tanod ang biktima na humabol sa suspek sanhi para mahuli siya. Narekober sa suspek ang bag ngunit nawawala na ang P3,000 pera na napanalunan ng biktima sa raffle.
Samantala, nadakip sa Caloocan City ang holdaper na nambiktima naman ng babae na kagagaling lang sa check-up sa ospital. Nakilala ang naarestong suspek na si Jomarie Lascano, ng Potrero, Malabon City.
Naglalakad ang biktimang si Mary Anne Maguit, 22, sa tapat ng BMC Public Market sa may Monumento, Caloocan dakong alas-8 ng gabi para bumili ng gamot nang dikitan siya ng suspek at tutukan ng patalim. Dito sapilitang hinablot ng suspek ang bag ng biktima at nagtatakbo.
- Latest