Apol papalit kay Bato sa PNP
Nakatakdang magretiro ang kasalukuyang Philippine National Police Director General Ronald dela Rosa sa kaniyang ika-56 na kaarawan sa Enero 21, 2018. Philstar.com/AJ Bolando, file
MANILA, Philippines — Kinilala na ang papalit sa pwesto ni Philippine National Police Director General Ronald dela Rosa kasunod ng kaniyang nalalapit na pagreretiro sa susunod na taon.
Si Deputy Director General Ramon Apolinario ang magiging panibagong hepe ng PNP kapag nagdiwang na si Dela Rosa ng kaniyang ika-56 na kaarawan sa Enero 21, 2018.
Inihayag ni Supt. Ercy Nanette Tomas, legal officer of the PNP Center for Police Strategic Management, ang nakaabang na promosyon kay Apolinario sa 3rd PNP National Advisory Council Summit sa Cebu City.
“Good news, the President has announced Sir Apol will be the next PNP chief,” wika ni Tomas.
Ilang beses na ring tinawag si Apolinario bilang susunod na hepe kahit wala pa ang pormal na pahayag.
“Let us welcome the incoming PNP chief, Deputy Director General Ramon Apolinario,” sabi ni Chief Supt. Noel Baraceros, director of the PNP CPSM, nang ipakilala niya ang guest of honor at speaker ng summit.
Si Apolinario ang isa sa tatlong pinagpilian ni Duterte nang maupo siya sa pwesto. Kabilang dito sina Dela Rosa at Directorate for Personnel and Records Management chief Rene Asperas.
Hindi pa naman alam kung tuluyang magreretiro si Dela Rosa dahil nabanggit niya noon na handa siyang manilbihan sa gobyerno kung nanaiisin ni Duterte.
Nabanggit din ng kasalukuyang hepe ng PNP na bukas siya sa pagtakbo bilang senador sa 2019 midterm elections.
- Latest
