Marawi rehab aabutin ng P90B ang gastos – mayor

MANILA, Philippines — Tumataginting na P90 bilyon ang kinakailangan upang maayos ang Marawi City ayon sa kanilang alkalde ngayong Biyernes.

Sinabi ni Marawi City Mayor Majul Usman Gandamra na hindi lamang restoration ang gagawin sa lungsod ngunit pagagandahin na rin ito.

“If we will rebuild Marawi, we will not just restore the city. But of course, we will make it better than it was before,” wika ni Gandamra.

“And of course, no amount of money that can compensate what happened in Marawi,” dagdag niya.

Kasama na sa naturang halaga ang pagkakaroon ng mapagkakabuhayan ng mga naapektuhang residente.

“Because as a result of this siege, almost 100 percent of our economic operation totally collapsed,” sabi niya.

Limang buwan tumagal ang bakbakan sa lungsod matapos itong sugurin ng ISIS-inspired Maute terror group.

Nitong nakaraang buwan lamang natapos ang kaguluhan sa pagkasawi ng dalawa sa mga pinuno nito na sina Isnilon Hapilon at Omar Maute.

Sinabi ni Defense Secretary Delfin Lorenzana na naglaan ang Budget Department ng P5 bilyon para sa Marawi ngayon taon, malayo sa halagang sinabi ni Gandamra na kailangan.