Digong ‘di naniniwalang nagnakaw ang mga sundalo sa Marawi
MANILA, Philippines — Hindi naniniwala si Pangulong Duterte sa mga alegasyon na ilan sa mga sundalo na nakipaglaban sa Maute-ISIS sa Marawi City ay nagnakaw sa gitna ng labanan.
Sa kanyang speech sa Army General Hospital sa Taguig City, sinabi ng Pangulo na “intriga” lamang ang mga bintang.
“Iyung mga imbestigasyon na nagnakaw daw sa Marawi, ‘di ako naniwala d’yan. Nandoon ako… ‘di ako naniniwala ang sundalo ko magnanakaw,” sabi ni Duterte. “Saan mo ilagay yan? Pag-uwi niyo puro kayo nakasakay sa trak.”
Aniya, normal lang na gamitin ng sundalo sa giyera ang mga abandonadong gamit pero hindi para nakawin ito.
Una nang sinabi ng militar na anim na sundalo ang iniimbestigahan dahil sa report ng nakawan sa Marawi City.
Sabi ni Col. Romeo Brawner, deputy commander ng Joint Task Group Ranao, na isang opisyal at 5 sundalo ng Philippine Army ang iniimbestigahan dahil umano sa nangyaring nakawan sa Marawi City, matapos magsilikas ang mga residente.
Nangyari umano ang looting sa unang linggo ng Marawi siege.
- Latest