2 todas, 3 sugatan sa pamamaril sa Quezon City
MANILA, Philippines — Todas ang dalawang lalaki habang sugatan ang tatlo pa, kabilang ang isang walong taong gulang na batang lalaki sa magkahiwalay na insidente ng pamamaril sa Quezon City, kahapon ng madaling araw.
Ang unang insidente ay naganap dakong ala-1:00 ng madaling araw sa Kasunduan St., Brgy. Commonwealth, Quezon City at naging biktima ay kinilalang Ronilo Emeteryo, 31.
Si Ronilo ay nasawi sa pinangyarihan ng insidente matapos na siya ay pagbabarilin ng hindi pa nakikilalang suspek habang nakikipag-inuman sa ilang kaibigan sa lugar.
Tinamaan naman ng stray bullet na ngayon ay ginagamot sa East Avenue Medical Center sina Mark Emeteryo, 19; Ryan Christian Mallari, 19 at Nelbron Emeteryo, 8, grade III, na noon ay natutulog lamang sa loob ng kanilang tindahan. Sila ay pawang residente ng nasabing lugar.
Ang ikalawang insi-dente ay naganap dakong alas-3:00 ng madaling araw sa tapat ng isang canteen sa Brgy. Batasan, Quezon City at ang na-ging biktima ay hindi pa nakikilala na tinatayang nasa edad 35-40, 5’4 ang taas, katamtaman ang pangangatawan na may tattoo ng ahas at mukha ng babae sa kanyang magkabilang braso.
Limang basyo ng hindi pa matukoy na uri ng baril ang natagpuan ng SOCO sa pinangyarihan ng krimen.
Inaalam pa ng mga awtoridad kung may kinalaman sa iligal na droga ang magkasunod na pamamaslang sa dalawang biktima.
- Latest