Martial Law extension dedesisyunan pa ni Duterte
Ayon kay Presidential Communications Sec. Martin Andanar, mas alam ng AFP ang sitwasyon pagdating sa seguridad ng bansa at mahalagang matiyak ang kaligtasan ng mga mamamayan. AP, File
MANILA, Philippines — Nirerespeto umano ng Malacañang ang naging rekomendasyon ng Armed Forces of the Philippines (AFP) na palawigin pa ang Martial Law sa Mindanao kahit natapos na ang kaguluhan sa Marawi City.
Ayon kay Presidential Communications Sec. Martin Andanar, mas alam ng AFP ang sitwasyon pagdating sa seguridad ng bansa at mahalagang matiyak ang kaligtasan ng mga mamamayan.
Nauna ng inilutang ni AFP spokesman Major Gen. Restituto Padilla ang posibilidad na palawigin pa ang martial law sa Mindanao na nakatakdang magpaso sa katapusan ng taon.
Ipinunto ni Padilla ang banta pa ng ibang grupo na hindi napupuksa ng mga puwersa ng gobyerno.
Bagaman katanggap-tanggap sa Malacañang ang rekomendasyon ng AFP, si Pangulong Duterte pa rin anya ang magpapalabas ng desisyon sa huli.
Ayon kay Andanar, pag-aaralan ni Pangulong Duterte ang rekomendasyon ng militar at siya ang magdedesisyon sa bandang huli.
“Of course, we respect the wisdom of (Major) General Restituto Padilla and the Armed Forces of the Philippines. Sila naman talaga ang nakakaalam sa mga ganyang subject, pagdating sa pakay ng national security and they have all the reason to give their thoughts because ang pinakamahalaga talaga sa lahat eh ang seguridad ng bawat Pilipino,” pahayag ni Andanar.
Idinagdag ni Andanar na marami pa ring problema na dapat resolbahin lalo na sa Marawi City katulad ng rehabilitasyon at clearing operations at tiyak na may iba pang elemento na posibleng magsamantala sa sitwasyon.
Sa ngayon, kabilang sa target ng military operations sa Mindanao ang Bangsamoro Islamic Freedom Fighters (BIFF), Abu Sayyaf Group at iba pang lawless elements.
- Latest
