$2M suporta ni Trump sa drug war ni Digong
MANILA, Philippines — Nagpasalamat kahapon ang Malacañang sa $2 milyong pangakong suporta ni US Pres. Donald Trump para sa anti-drug campaign ni Pangulong Duterte.
Ayon kay Presidential Spokesman Harry Roque, ang pahayag na ito ng White House kahapon ay maituturing na pagkilala at pagsuporta mismo ni Trump sa drug war na inilunsad ni Pangulong Duterte.
“President Trump announced $2 million to support drug demand reduction programs in the Philippines,” bahagi ng statement ng White House.
Ani Roque, lalo sigurong natuwa si Pangulong Duterte kung ito ay mismong inihayag ni President Trump sa kanilang bilateral talks sa sidelines ng ASEAN Summit.
Magugunita na nagkaroon ng bilateral talks sina Pangulong Duterte at President Trump sa 31st ASEAN Summit kung saan ay siniguro ng Estados Unidos ang patuloy na relasyon nito sa Pilipinas.
Mismong si White House Press Sec. Josh Earnest ang nag-anunsiyo sa naging desisyon ni President Trump na paglalaan ng $2 milyon para sa anti-drug campaign ng Duterte administration.
Pero bagama’t “belated” na ang statement, labis na ipinagpapasalamat ng Palasyo ang nasabing alok na tulong ng US government sa pagresolba ng illegal drugs trade sa bansa.
Patunay daw itong kinikilala ni Trump na tama ang diskarte ni Pangulong Duterte sa kanyang anti-drug war na mahigpit na tinutuligsa ng ilang local at foreign human rights groups.
- Latest