Taxi driver, pinatay sa harap ng 3 anak at asawa
MANILA, Philippines — Isang taxi driver ang binaril at napatay sa harap ng kanyang tatlong anak at asawa sa loob ng kanilang tahanan sa Quezon City, kahapon ng madaling araw.
Ang biktima ay kinilalang si Adrian Galang, 39, ng Libis Extension, Brgy. Batasan Hills, Quezon City na nagtamo ng tama ng bala sa batok na siyang dahilan ng kanyang agarang kamatayan.
Sa imbestigasyon ni PO3 Alvin Quisumbing, may hawak ng kaso, naganap ang krimen dakong ala-1:00 ng madaling araw sa loob ng tahanan ng biktima.
Ayon sa misis ng biktima na si Zaineth, pumasok ang gunman sa kanilang bahay habang sila ay natutulog na.
Tinawag at ginising umano ang biktima habang katabi nitong natutulog ang tatlong anak at asawa at habang papatayo ito ay agad na binaril sa batok.
Hinala ni Zaineth na may kinalaman sa ilegal na droga ang motibo sa krimen dahil dati na umanong nag-positibo sa drug test ang biktima at una na ring sumuko sa ‘Oplan Tokhang’ ng pulisya.
Sa ngayon ay nagsasagawa pa ng masusing imbestigasyon ang mga awtoridad para matukoy ang pagkakakilanlan ng suspek at motibo sa krimen.
- Latest