Solon kay Trudeau: Hakutin agad ang basura nyo!
Ito ay para patunayan umano ni Canadian Prime Minister Justin Trudeau na totoo ang kanyang binitawang pangako kahapon sa ASEAN-Canada 40th Anniversary Commemorative Summit na “committed” sa paghahanap ng solusyon ang Canada sa kanilang mga basurang itinambak sa Pilipinas. Philstar.com/Efigenio Toledo IV
MANILA, Philippines — Umapela si Anakpawis Rep. Ariel Casilao kay Canadian Prime Minister Justin Trudeau na kaagad ipahakot ang mga basurang dinala dito sa Pilipinas mula sa Canada.
Ito ay para patunayan umano ni Trudeau na totoo ang kanyang binitawang pangako kahapon sa ASEAN-Canada 40th Anniversary Commemorative Summit na “committed” sa paghahanap ng solusyon ang Canada sa kanilang mga basurang itinambak sa Pilipinas.
Giit pa ni Casilao, umaasa silang magiging agaran ang pag-aalis ng mga basura ng Canada na tatlong taon nang nakatambak sa bansa.
Nangangamba rin ang kongresista na maging banta sa kalusugan ang basura ng Canada kung patuloy na tatagal pa ito sa bansa.
Ipinaalala rin ng kongresista na ang nangyaring pagtatapon ng basura ng Canada sa Pilipinas ay bunsod na rin ng korapsyon noon sa Customs na huwag na sanang maulit ngayon.
Pinuna pa ng mambabatas ang trade policy ng bansa na masyadong bukas sa foreign exports na madalas ay nauuwi sa pang-aabuso.
- Latest
