Ralista binalaan ni ‘Bato’
MANILA, Philippines — Nagbanta si Philippine National Police (PNP) Chief Gen. Ronald “Bato” dela Rosa na magkakaroon ng salpukan sa pagitan ng mga otoridad at mga nagpoprotesta kapag nagpumilit silang pumasok sa mga lugar na pagdarausan ng ASEAN Summit na naka-lockdown.
Sinabi ni dela Rosa na dapat iwasan ng mga nagpoprotesta ang mga lugar ng Clark Freeport, EDSA, Roxas Boulevard, CCP Complex, Philippine International Convention Center (PICC), at iba pang mga lugar na naka-lockdown.
Giit ng PNP chief na ang nasabing mga lugar ang dapat iwasan dahil dito ang may mga pinakamaraming movement.
Kung magpupumilit umano ang mga militante at raliyista na pumasok sa nasabing mga lugar ay magkakaroon ng salpukan sa pagitan ng mga pulis bagamat paiiralin pa rin umano ng pulisya ang maximum tolerance.
Nilinaw naman ni dela Rosa na sa ngayon ay wala silang nakikitang banta para sa 31st ASEAN Summit kaya sa ngayon ay nakatutok lamang sila kung paano aayusin ang grupo ng mga raliyista na nagsimula kahapon.
Kahapon ay nagdatingan sa bansa ang mga world leaders para sa summit.
Nagtalaga ng 60,000 security personnel mula sa 21 government agencies kabilang na rito ang PNP, Philippine Coast Guard (PCG), Bureau of Fire Protection (BFP) at Armed Forces of the Philipipnes (AFP) na dineploy sa Metro Manila at Clark, Pampanga.
- Latest