Regulasyon sa nakukumpiskang droga, inilabas ng BOC
MANILA, Philippines — Inilabas na ng Bureau of Customs (BOC) ang kanilang regulasyon sa tamang paghawak ng mga nasasamsam na ilegal na droga.
Ang pagpapalabas ng bagong panuntunan ay bunsod na rin ng kontrobersiyang nilikha ng pagkakapuslit sa bansa ng may P6.4 billion shabu shipment sa BOC.
Sa pahayag ni Customs Commissioner Isidro Lapeña, sa ilalim ng Memorandum 2017-11-004 ang lahat ng mga hinihinalang iligal na droga at controlled precursor and essential chemicals (CPECs) na nadiskubre sa hurisdiksyon ng BOC ay kinakailangang agad na iulat sa Customs Anti-Illegal Drugs Task Force (CAIDTF) para sa maayos na koordinasyon sa PDEA.
Binigyang diin pa ni Lapeña na ang PDEA ang pangunahing ahensya ng gobyerno pagdating sa mga nahuhuling ilegal na droga.
Matatandaan na mainit na natalakay sa pagdinig ng Senado at Kamara ang umano’y hindi maayos na paghawak ng BOC sa mahigit 600 kilo ng shabu na nasamsam mula sa isang warehouse sa Valenzuela City.
Dagdag pa ni Lapeña, importanteng masunod ang itinatakda ng Republic Act 9165 at Comprehensive Dangerous Drugs Act of 2002.
- Latest