Lahat ng bihag ng Maute nabawi na
MANILA, Philippines — Wala nang hawak na mga bihag ang natitirang teroristang Maute sa main battle area sa Marawi City.
Sinabi ni Col. Romeo Brawner, deputy commander ng Joint Task Group Ranao, na ang naiwan na lamang sa isang gusali ay ang mga asawa ng mga terorista na mas piniling makipaglaban kasama ang kanilang mga asawa bagamat binigyan nila ng pagkakataon na sumuko sila.
Naniniwala si Brawner na wala ng hawak na hostages ang mga terorista dahil ang huli nilang na-rescue ay 20.
Subalit may posibilidad din umano na ang ibang mga bihag ay umanib na sa mga terorista at sila rin ang nakikipaglaban ngayon.
Nilinaw naman ng opisyal na ang mga asawa ng mga terorista na sumuko sa mga otoridad ay itatratong non-combatants at sasailalim sa psychosocial debriefing.
Sa pinakahuli nilang bilang noong Sabado ay mayroon na lamang natitirang 30 terorista sa Marawi at lima dito ang foreign fighters subalit hindi pa nila makumpirma kung ilan na ang napapatay sa kahapong bakbakan.
Naniniwala naman si Brawner na kasama sa mga nakikipaglaban ang teroristang si Aman Bacu na posibleng maging susunod na lider ng mga terorista.
Ang pagkamatay umano nina Isnilon Hapilon at Omar Maute ay nag-iwan ng “leadership vaccum” sa grupo.
Samantala, tiniyak ng Armed Forces of the Philippines (AFP) na mga residente ng Marawi ang siyang makakabalik sa kanilang mga tahanan.
Ayon kay Brawner, na kanilang sisiguraduhin na hindi mahaluan ng mga hindi residente ang siyudad ng Marawi.
Aniya, ang magiging basehan o baseline ng militar ay ang census na ginawa ng pamahalaan.
Pero ayon kay Brawner subject for verification pa ang mga ito ng AFP at PNP.
Sa ngayon hinihintay na lamang ng militar ang mga isusumiteng kondisyon na itinakda ng AFP sa pamahalaang lokal ng Marawi at Lanao del Sur.
Sa sandaling makumpleto na ang hinihiling nilang kondisyon ay kanila ng papayagan na makabalik ang mga residente.
- Latest