500 sundalo umuwi na
Isang matamis na halik at yakap mula sa kanilang mga anak ang sumalubong sa mga sundalo ng 1st Infantry Battalion ng 2nd Infantry Division ng Philippine Army nang dumating kahapon sa Villamor Airbase mula sa halos limang buwang pakikipaglaban sa Maute-ISIS terrorists sa Marawi City. (Bernard Testa/News5/InterAksyon.com)
MANILA, Philippines — Nagbawas na ng tropa ang Armed Forces of the Philippines (AFP) sa Marawi City matapos mapaslang ang mga matataas na lider ng Maute-Islamic State of Iraq and Syria (ISIS) na siya ring naging hudyat upang ideklarang malaya na ang lungsod sa teroristang grupo.
Kahapon lulan ng C130 plane ay dumating na sa Villamor Air Base bandang alas-4 ng hapon ang isang batalyon o 500 sundalo na tropa ni Col. Christopher Tampus, commander ng 1st Infantry “Always First” Battalion ng 2nd Infantry Division ng Philippine Army.
Bago ito ay nagkaroon ng send-off ceremony sa tropa ni Tampus na isinagawa nina AFP Western Mindanao Command Chief Lt. Gen. Carlito Galvez Jr. at Major Danilo Pamonag, commander ng Joint Task Force (JTF) Marawi sa Camp Ranao, Marawi City.
“Maintain the highest dignity of a soldier. As much as we want to have you here, we need to let you go. Our oath is to serve the people and maintain the integrity of our country,” tagubilin ni Galvez sa tropa ni Tampus.
Si Tampus at tatlo pang company commander ng Army’s 1st Infantry Battalion ay ginawaran ng Silver Cross Medal.
Bahagi ng tropa ni Tampus ay mangangalaga sa seguridad sa gaganaping Association of Southeast Asian Nations (ASEAN) Leaders Summit sa darating na Nobyembre.
Ang anim pang batalyon ng mga sundalo ay mananatili muna sa Marawi City para tumulong sa isasagawang rehabilitasyon sa lungsod.
- Latest
