Dagdag buwis sa mining industry kinatigan
MANILA, Philippines — Kinatigan ni Department of Environment and Natural Resources (DENR) Sec. Roy Cimatu na taasan ang excise tax ng mining industry dahil sobrang liit daw ang sinisingil dito ng gobyerno sa kasalukuyan.
Sinabi ni Sec. Cimatu sa media briefing sa Malacañang, sobrang liit ang sinisingil na 2 percent excise tax ng gobyerno sa mga mining companies kaya nararapat na taasan ito.
Inamin din ng kalihim na wala pang nasisingil ang gobynero mula sa mga penalties sa mga minahan sa bansa na natuklasang lumabag sa batas.
“DENR is still awaiting finalization of audit for mining companies recommended closed by former Secretary Gina Lopez,” paliwanag pa ni Cimatu sa Malacañang reporters kahapon.
Samantala, sinabi rin ng DENR chief na tinitignan nila ang alternative method na waste to energy scheme upang maresolba ang problema sa basura sa bansa.
Aniya, ang tanging pinagtatapunan na lamang ng 6,000-8,000 tons ng Metro Manila garbage araw-araw ay ang Rodriguez landfill matapos nang isara ang Payatas at Navotas landfill.
Idinagdag pa ni Cimatu, nakatakdang isara na rin ang Rodriguez landfill sa taong 2020 sa sandaling mapuno na rin ito.
- Latest