Ratings ni Digong babagsak pa - Trillanes

MANILA, Philippines - Naniniwala si Sen. Antonio Trillanes na patuloy pang babagsak ang ratings ni Pangulong Rodrigo Duterte sa mga susunod pang resulta ng survey.

Sinabi ito ni Trillanes matapos lumabas ang resulta ng Social Weather Stations survey para sa ikatlong quarter ng taon kung saan malaki ang ibinaba ng mga grado ni Duterte.

Aniya nakikita na ng mga Pilipino ang totoong pagkatao ng pangulo na patuloy na binabatikos sa kaniyang madugong kampanya laban sa ilegal na droga.

Sinabi ni Trillanes na wala talagang kakayahan si ang dating Davao City mayor Duterte na pamunuan ang bansa.

“It's very encouraging to know that the Filipino people are beginning to see the light. They are now seeing Duterte for who he really is: a lying, rude, amoral, corrupt and oppressive former mayor who is totally incompetent about governance at the national level,” pahayag ng senador.

“Worse, his bloody war on drugs has killed thousands of his own people and created a climate of fear across the country,” dagdag niya.

Bumagsak ng 18 points ang satisfaction rating ni Duterte na +48 na lamang mula sa +66 nitong Hunyo.

Nabawasan din ng 15 points ang trust rating ni Duterte na ngayon ay +60 na lamang.

Inaasahan ng isa sa mga matitinding kritiko ng pangulo na lalo pang bababa ang ratings ni Duterte lalo na’t sinimulan na ng Office of the Ombudsman ang imbestigasyon sa umano’y tagong yaman ng kanilang pamilya.

“To think that this survey was done just before the Ombudsman confirmed Duterte's billion peso bank deposits, so the next survey results are expected to be worse,” sabi ni Trillanes.

Hinamon ni Trillanes si Duterte na pirmahan ang bank secrecy waiver upang masilip ang totoong yaman ng pangulo.

Ayaw naman itong tugunan ng pangulo na pinaratangan naman si Trillanes na may bank accounts sa ibang bansa ngunit kalaunan ay napatunayang wala.