Kilalanin: Potential senatorial bets ng PDP-Laban sa 2019

MANILA, Philippines — Anim na pangalan ang ibinigay ni Senate President Aquilino "Koko" Pimentel III na magiging pambato ng Partido Demokratiko Pilipino- Lakas ng Bayan sa 2019 midterm elections para sa pagka-senador.

Kabilang sa anim si Pimentel, gayun din sina House Majority Leader Rodolfo Fariñas (Ilocos Norte), presidential adviser at dating MMDA chairman Francis Tolentino, Rep. Karlo Nograles (Davao City), Rep. Geraldine Roman (Bataan) at Rep. Alfredo Abelardo Benitez (Negros Occidental).

Kaagad naman nilinaw ng senate president na hindi pa ito pinal.

Sinabi ni Pimentel na susubukan nilang makabuo ng 12 kandidato at kung hindi ito magagawa ay bukas sila na makipagsanib-pwersa sa ibang partido.

"If we cannot come up with 12, then we are open to entering into coalition agreements with other parties. This is a 'developing/evolving' matter hence not final not official; just my personal preferences,” sabi ni Pimentel.

Tatlo sa pinangalanan ni Pimentel ay dating miyembro ng Liberal Party (LP) na sina Roman, Benitez at Fariñas.

Nasa senatorial slate sana ng LP noong 2016 polls si Tolentino ngunit natanggal matapos ang kontrobersya na kinasangkutan kung saan may mga sexy dancers na sumayaw sa isang political gathering ng partido sa Laguna.

Samantala, hindi pa rin tiyak si Pimentel dahil sa nakasaad sa 1987 Constitution na hanggang dalawang sunod na termino lamang ang mga senador.

Naging kontrobersyal ang kaniyang unang termino bilang senador matapos ang electoral fraud noong 2007. Nagbitiw si Sen. Juan Miguel Zubiri bago pa man maglabas ng hatol ang Senate Electoral Tribunal upang ibigay ang upuan kay Pimentel.

Halos dalawang taon na lamang ang natira kay Pimentel bago muling nanalo noong 2013 elections.