Impeachment ni Sereno lusot sa House committee

MANILA, Philippines — Tuloy ang impeachment kay Chief Justice Maria Lourdes Sereno matapos makakita ng sapat na basehan ang House Committee on Justice ngayong Huwebes.

Sa botong 25-2, dadalhin na sa plenaryo ang reklamong inihain ng abogadong si Larry Gadon laban kay Sereno dahil sa paglabag umano sa Saligang Batas, katiwalian, at betrayal of public trust.

Pagbobotohan ng buong Kamara kung dapat aprubahan o ibasura ang desisyon ng komite.

Mangangailangan ito ng 98 boto mula sa 292 miyembro ng Kamara bago ito dalhin sa Senado na tatayong impeachment court.

Nauna nang sinabi ni House Speaker Pantaleon Alvarez na kumpiyansa siya na marami ang boboto sa pag-usad ng impeachment ni Sereno.

Sa 54-pahinang impeachment complaint ni Atty. Larry Gadon ay inakusahan nito si Sereno ng pamemeke ng dokumento sa Korte Suprema, pagharang at pagbalam sa petition for retirement benefits ng mga mahistrado at hukom, pagkabigong ilantad ang kanyang SALN at pagmamanipula sa shortlist ng Judicial and Bar Council ‘for personal and political reasons’.