Kumpirmado: Pacquiao-Horn rematch hindi tuloy ngayong taon

MANILA, Philippines – Sa unang pagkakataon, sasabak si Jeff Horn upang depensahang ang kaniyang titulo laban sa isang Briton sa darating na Disyembre.

Sa ulat ni Dan Rafael ng ESPN, makakabangga ni Horn ang hindi kilalang si Gary Corcoran sa Disyembre 15 sa Brisbane, Australia para sa WBO welterweight championship.

"We are clearing a location in Brisbane and once that is cleared then we can go ahead with doing the fight, which will now take place in December instead of November, which is what we were originally planning," pahayag ni Top Rank chief Bob Arum.

Dahil dito, hindi na talaga matutuloy ngayong taon ang nilulutong rematch sa pagitan ni Horn at ni eight-division champion Manny Pacquiao.

Humirit ng rematch si Pacquiao matapos maagaw ni Horn ang kaniyang titulo nitong Hulyo ngunit hindi maplantsa ang detalye ng laban.

Nais umano ni Pacquiao na gawin sa Pilipinas ang rematch ngunit ayaw naman itong gastusan ni Arum at ng Department of Tourism.

"If Horn beats this kid [Corcoran], we could do the Pacquiao rematch in the first part of 2018 or go right to a [Horn] fight with [Terrence] Crawford," sabi ni Arum.

Sinabi ni Arum na nakadepende ito lahat kung gusto pang lumaban ni Pacquiao na isa ring senador.