Ex-Cong. Asistio, pinakakasuhan ng Ombudsman sa P8M pork scam

MANILA, Philippines — Pinakakasuhan na ng tanggapan ng Ombudsman si dating Congressman Luis Asistio matapos mapatunayang guilty kaugnay ng Priority Development Assistance Fund (PDAF) scam. 

Si Asistio na nagsilbing congressman ng 2nd district ng Caloocan mula 2004 hanggang 2010 ay nahaharap sa 4 counts ng paglabag sa kasong graft, 2 counts ng malversation at 2 counts ng malversation thru falsification of public documents dahil sa umano’y  maanomalyang paggamit ng kanyang pork barrel. 

Kapwa akusado ni Asistio ang mga dating opisyales na sina DSWD Esperanza Cabral, Mateo Montaño, Leonila Hayahay; at Cenon Mayor ng Kaloocan Assistance Council, Inc. (KACI).

Nag-ugat ang kaso sa umano’y disbursement vouchers na inaprubahan ni Asistio sa hindi nagawang proyekto.

Patuloy umanong inindorso ni Asistio ang paggamit ng kanyang PDAF-funded Comprehensive Integrated Delivery of Social Services (CIDSS) programs sa KACI. 

Mula 2006 hanggang 2007, P15 million ang nakapaloob sa dalawang Special Allotment Release Orders na mula sa PDAF ni Asistio at nai-release sa DSWD bilang implementing agency. 

Sa P15 million, P8 million ay naibigay sa KACI sa pamamagitan ng DSWD para sa implementasyon ng CIDSS program sa 2nd district ng Caloocan. Ang pondo ay ginamit daw sa pagbili ng medical supplies atsoldering parts, meals, chemicals sa fumigation, diesel, baby oil, alcohol bottles, tarpaulins, t-shirts at kit bags. 

Sa imbestigasyon ng Ombudsman, napatunayan na ang incorporators at officers ng KACI ay mga dating political coordinator, volunteers at supporters ni Asistio at ang tanggapan nito ay sa mismong tanggapan din ng mambabatas.