Faeldon kulong sa Senado hanggang 2019
MANILA, Philippines — Posibleng magtagal sa detensyon ng Senado si dating Bureau of Customs (BoC) Commissioner Nicanor Faledon ng hanggang Hunyo 2019 dahil sa pagmamatigas nito na huwag humarap sa pagdinig ng Senate Blue Ribbon Committee.
Ayon kay Senate Minority Leader Franklin Drilon, kung makikipagmatigasan si Faeldon sa komite na dumidinig sa isyu ng P6.4 bilyong shabu na nakalusot sa BoC mula China, mananatili siya sa Senado hangga’t hindi binabawi ang detention order o hanggang sa matapos ang kasalukuyang 17th Congress sa Hunyo 2019. Aniya, walang expiration ang contempt na ipinataw ng komite kay Faeldon.
“To me, the contempt of the committee is the contempt of the senate. That’s the rule. To me, he should stay there until the 17th Congress adjourns,” ani Drilon.
Hindi rin umano maaaring masunod ang gusto ni Faeldon na hindi haharap sa komite hangga’t miyembro ng Senado sina Senators Panfilo “Ping” Lacson at Senator Antonio Trillanes IV na kapwa nagsasangkot sa kanya sa katiwalian nang umupo sa BoC. Wla aniyang karapatan si Faeldon na magsampa ng reklamo sa Ethics committee kung hindi naman nito inirerespeto ang proseso ng Senate Blue Ribbon Committee.
Hindi rin aniya maaaring humiling si Faeldon sa ethics committee na parusahan sina Lacson at Trillanes na kapwa niya sinampahan ng kaso kung hindi naman nito inirerespeto ang proseso ng isa pang komite ng Senado.
- Latest
