Tulay nabawi na sa Maute
MANILA, Philippines — Sa kauna-unahang pagkakataon ay natawid na ng mga opisyal ng militar ang mga tulay na inokupa ng Maute group nang magsimula ang Marawi siege noong Mayo 23.
Pinangunahan nina Major Generals Rolando Bautista at Danilo Pamonag, commander ng Joint Task Force Maraw at Commander ng Joint Speacial Operations Task Force Trident ang pagtawid sa Bayabao Bridge at Masui Bridge kahapon ng alas-10 ng umaga.
Ang nasabing mga tulay ay nabawi at nakontrol kamakailan ng tropa ng pamahalaan mula sa Maute terrorist group.
Sinalubong naman ang dalawang commander sa kabilang tulay ni Brigadier General Melquiades Ordiales, commander ng Joint Task Group Tiger.
Sinabi ni Bautista na maituturing na significant progress ang kanilang ginawa dahil sa effort ng Armed Forces of the Philippines (AFP) at Philippine National Police (PNP) na matalo ang mga terorista, masagip ang mga hostages at muling mabawi ang buong siyudad ng Marawi.
Dahil dito kaya naniniwala ang opisyal na desperado na ang mga terorista dahil sa patuloy ang mga sundalo at pulis sa kanilang defensive positions.
Muli namang umapela si Bautista sa mga terorista na sumuko na at pakawalan ang kanilang mga hostage.
Sa ika-125 araw naman ng giyera sa Marawi ay umabot na sa 151 sundalo at pulis ang nagsakripisyo habang 694 terorista ang napapatay.
- Latest