1,141 katao inilikas sa flashflood
Sa ulat ng Office of Civil Defense (OCD) IV-B, dakong alas-10 ng umaga kahapon nang umapaw ang ilog sa Brgy. El Vita at Claudio Salgado sa Sablayan, Occidental Mindoro. File
MANILA, Philippines — Umaabot sa 1,141 katao ang inilikas dahil sa flashflood na rumagasa sa ilang barangay sa Sablayan, Occidental Mindoro at Bacolod City at iba pang bayan ng Negros Occidental sanhi ng malalakas na pag-ulan dulot ng low pressure area (LPA).
Sa ulat ng Office of Civil Defense (OCD) IV-B, dakong alas-10 ng umaga kahapon nang umapaw ang ilog sa Brgy. El Vita at Claudio Salgado sa Sablayan, Occidental Mindoro.
Nasa 82 pamilya ang inilikas sa Brgys. Ibud, Buenavista, San Vicente, Sto Niño at Poblacion na pawang sa bayan ng Sablayan.
Iniulat naman ng OCD Region 6 na nagdulot ng pagkakabuhol-buhol ng trapiko, pagkasira ng mga bahay, pagkawala ng supply ng kuryente ang malalakas na pag-ulan kung saan daang commuters ang na-istranded sa lungsod ng Bacolod sanhi ng southwest monsoon.
Naitala sa 277 pamilya ang inilikas sa lungsod ng Bacolod sanhi ng malalakas na pag-ulan simula pa nitong Biyernes ng gabi.
Sa Purok Mars, Brgy. Singcang airport, hindi magkandaugaga ang mga residente sa binansagang “Lechonan Country”sa pagsagip sa kanilang mga baboy na naglutangan sa baha.
Iniulat din ang mga pagbaha sa iba pang lugar sa Negros Occidental kung saan nasa 307 ang inilikas sa bayan ng Pontevedra at 149 sa Sipalay City.
- Latest
