‘Kiko’ lumakas pa, lalabas ng PAR mamayang gabi

MANILA, Philippines – Sa bumagal pang paggalaw palabas ng Philippine area of responsibility (PAR), lumakas pa ang bagyong “Kiko” habang binabagtas ang Balintang Channel, ayon sa state weather bureau ngayong Miyerkules.

Huling namataan ng PAGASA ang bagyo sa 115 kilometro kanluran ng Basco, Batanes kaninang alas-10 ng umaga.

Taglay ni Kiko ang lakas na 60 kilometer per hour at bugsong aabot sa 70 kph habang gumagalaw pa hilaga-kanluran sa bilis na 10 kph.

Wala namang nakataas na tropical cyclone warning signals sa buong bansa.

Inaasahan na lalakas pang muli at magiging tropical storm ang bagyo sa loob ng 24 oras.

Tinatayang lalabas ng PAR si Kiko mamayang gabi o bukas ng umaga.