Gordon, Trillanes nagkabangayan

MANILA, Philippines -  Nagkainitan kahapon sina Senators Richard Gordon at Antonito Trillanes IV sa pagpapatuloy ng pagdinig ng Senate Blue Ribbon committee ukol sa P6.4 bilyong shabu mula sa China.

Ito’y makaraang tawagin ni Trillanes na “komite de abswelto” ang panel dahil sa patuloy na pagtanggi na imbitahan sina Davao City Vice Mayor Paolo “Polong” Duterte at kanyang bayaw o brother-in-law na si Manases Carpio.

Nauna rito, idinawit ni Trillanes si Vice Mayor Duterte at bayaw nito sa tinatawag na Davao Group na diumano’y nasa likod ng smuggling ng ilang cargo shipments sa Bureau of Customs (BoC).

Lumutang kahapon sa pagdinig si Davao City Councilor Nilo “Small” Abellera na tinukoy ni customs broker Mark Taguba II na isa sa mga kasapi ng “Davao Group” na binabayaran umano niya ng P5 milyon “enrollment fee” para matiyak na mapapabilis ang pagpapalabas ng kanyang shipments.

Iginiit ni Trillanes na dapat paharapin din sa hearing sina Duterte at Carpio para ipaliwa­nag ang kanilang panig tungkol sa Davao Group matapos ipakita ni Taguba ang palitan niya ng text messages kina “Tita Nani” at “Jack”.

Pero kinuwestiyon nina Gordon at Senate Majority Leader Vicente Sotto III ang testimonya ni Taguba lalo pa’t hindi nito maalala kung saang restaurant sila nag-meeting ni Abellera.

Sinabi naman nina Gordon at Sotto na dapat munang magprisinta ng solid na ebidensiya si Taguba tungkol sa pagkakasangkot ni VM Duterte at Carpio sa transaksiyon bago nila ito imbitahin sa pagdinig.

Matapos nito, inakusahan ni Trillanes si Gordon na nagpapatakbo ng “one-man” show hearing dahil pinipigilan umano siyang magsalita at magtanong.

“You’re out of order. I will not dignify your statement,” ani Gordon na nagbanta na ipaghaharap niya ng reklamo sa Senate committee on ­ethics si Trillanes kaya namagitan na si Sotto at sinuspindi ang pagdinig.

Ayon pa kay Trillanes, hindi niya maintindihan kung bakit natatakot ang komite na imbitahan ang anak ni Pangulong Duterte at asawa ni Davao City Mayor Sara Duterte sa pagdinig gayong marami na silang inimbitahang resource persons.

Samantala, nakahanda naman si Trillanes na harapin ang anumang reklamong ihahain laban sa kaniya ni Gordon.

Bukod sa ethics case, itutuloy din daw ni Gordon ang contempt charges laban kay Trillanes.

Hindi na rin daw tatanggapin ng pinuno ng blue ribbon committee kahit mag-sorry pa ang kasamahang senador.

Matapos ang pagtatalo ng dalawa ay humingi naman ng paumanhin si Gordon sa publiko dahil sa naging sagutan nila.