Bong nami-miss ang showbiz, gustong bumalik sa pag-aartista

MANILA, Philippines — Naniniwala si dating Sen. Ramon "Bong" Revilla Jr. na mapalalaya rin siya at makakabalik sa mundo ng showbiz.

"Nami-miss ko na ang show business gusto ko bumalik sa pag-aartista. Public service naman kahit wala sa pulitika andoon pa rin yan e," pahayag ni Revilla matapos ang dumalo sa pagdinig ng kaniyang plunder case.

Tatlong taon nang nakakulong si Revilla dahil sa umano’y maanomalya niyang paggamit ng Priority Development Assistance Fund.

Pinasalamatan din ni Revilla si Pangulong Rodrigo Duterte matapos niyang batikusin ang Office of the Ombudsman dahil sa umano’y “selective justice.”

Ayon sa pangulo, inuunang mapakulong ng Ombudsman ang mga kalaban ng nakaraang administrasyon.

"It seems that the Office of the Ombudsman has mastered the art of selective justice – hard on some, soft on others...slow to act on complaints against the friendly but quick to decide against perceived hostiles," wika ni Duterte.

Hiniritan din ni Duterte ang Ombusdman dahil sa mabagal na pag-usad ng kaso ni Revilla at dating mga senador na sina Jinggoy Estrada at Juan Ponce Enrile.

Samantala, sinabi ng abogado ni Revilla na si dating Solicitor General Estelito Mendoza na nilalabag na ang karapatan ng dating senador dahil hindi pa naman siya napatutunayang nagkasala.

"Senator Revilla is under detention for about four years now. In my opinion, and I will raise this point to the court, his detention has ceased to be preventive but rather becomes punitive," wika ni Mendoza.

“I think this violation of a human right to liberty is being committed within the judiciary itself and it is the judiciary which must rectify (this damage),” dagdag niya.